Indodana kaPatrick Shai isibuyele ezidakamizweni futhi ayinakhaya

“Ngicela usizo, ngidinga ukuya erehab ngaphambi kokuthi kudlule isikhathi.” Lawa ngamazwi kaSechaba oyindodana yomlingisi ongasekho uPatrick Shai. USechaba (42) osehlala emgwaqeni uthi ukushona kukayise yikhona okumenze wabuyela ezidakamizweni.

USechaba oseziphilisa ngokuphusha izinqola zasesitolo esiseMeadowlands Mall eSoweto, ubehlanzekile iminyaka emibili ngaphambi kokuthi aphinde abuye ngoJulayi 2023. Umthombo omuhle kakhulu ohlangane noSechaba uthi, indodana yomlingisi wodumo ithi yaxoshwa ekhaya eDobsonville ngunina uMmasechaba Shai. “Ngaphatheka kabi uma ngimbona ekuleso simo, lo mfana ubebukeka emuhle efuze uBob Mabena futhi uhlakaniphe kakhulu. Manje usefana nohobo ngenxa yezidakamizwa” kusho umthombo. Ngokusho komthombo, uSechaba uyakwazi ukuthenga ukudla nezidakamizwa ngemali ayenza ngokuphusha amatroli abathengi.

Umthombo uqhube wathi uSechaba wathi esinye isizathu esiholele ekutheni aphinde adle i-nyaope ne-crystal meth ukushona kukayise. UShai washona ngenxa yokuzibulala okwakubonakala sengathi uzibulele emzini wakhe oseDobsonville ngoJanuwari 2022 eneminyaka engu-65. Ngaleso sikhathi, uSechaba wayehlanzekile isikhathi esingaphezu konyaka futhi engxoxweni nabezindaba wathi ukushona kukayise kwamgqugquzela ukuthi ahlale ehlanzekile.

“Isifiso sakhe esikhulu bekuwukuba ngibe wumndeni oqotho kungakhathaliseki ukuthi ngangena kumuphi umkhakha,” esho ngaleso sikhathi. Umthombo uthe uSechaba nguyena owafica uyise elenga egaraji lakubo ngesikhathi lo mlingisi wodumo eqeda eyakhe eminyakeni emibili edlule. “Uthe akakaze akuthole ukwelulekwa ngalobo bunzima futhi uyise usamvakashela elele. Uthe umbona zonke izinsuku uma eyolala yingakho engazange alwe ngesikhathi unina emxosha endlini. Ubefuna nje ukungayi endlini ngethemba lokuthi amaphupho amabi azophela,”

USechaba uthe akukho okuningi angakusho kodwa unxuse ukuthi athole usizo lokuya erehab aguqule impilo yakhe. “Ngifuna ukuhlambuluka ngibuyele emuva ngibuyele ekubeni yingxenye yeKwanele Foundation lapho bengiphethe khona ehhovisi likaKwaneleNziswa ngifundisa abanye ngezindaba zezidakamizwa nokusebenzisa kabi izidakamizwa. Ngicela ningisize kungakephuzi.”