Kuboshwe 4 eLimpopo naseGauteng ngokubulawa kobhejane

Abomthetho esifundazweni saseLimpopo naseGauteng babambe ngempumelelo abesilisa abathathu nowesifazane, mayelana nezinsolo zokubulala obhejane ngokungemthetho esifundeni saseWaterberg. Lokhu kwenzeke ngemuva kokuthi iFarm Watch ibike ngezenzo ezisolisayo eziphathelene nokuzingelwa kobhejane epulazini lendawo endaweni yamaphoyisa eModimolle.

Ephendula ngokushesha, amaphoyisa asebenzise imininingwane ngenhloso yokuthungatha abasolwa abathinteka ezenzweni ezingekho emthethweni. Ngezithuba zabo-07:00, iziphathimandla zibambe izimoto ezithi yohlobo lwe-Kia kanye neChevrolet ebezisuka epulazini ziya esifundazweni saseGauteng.

Amaphoyisa amise i-Kia ngemuva kokuwela i-Kranskop Tollgate eModimolle nokuthe ngesikhathi bema, umsolwa oyedwa wesilisa nowesifazane babalekela ehlathini eliseduze, kodwa owesilisa oneminyaka engu-56 ubudala obehlezi esihlalweni esingemuva waboshwa ngokushesha. Ngesikhathi besesha imoto, abomthetho bathole uphondo lukabhejane lugoqwe ngendwangu, okuholele ekutheni kuqhutshekwe nophenyo.

Umkhankaso omkhulu ohlanganyelwe, ohlanganisa i-Provincial Stock Theft and Endangered Species Unit, Modimolle K9, Waterberg Flying Squad Team, Modimolle LCRC, Welgevonden Reaction, HPG, Modimolle, kanye ne-chopper yangasese yonogada, yenziwe yasebenza ukuze kutholwe abasolwa ababili ababalekile.

Ngemuva kwalokho, ngezithuba zabo-22:00, umsolwa wesifazane uboshwe ku-R101 eRadium elinde ukulandwa yimoto engaziwa.

Lo msebenzi uthole ukwesekwa okwengeziwe okuvela e-Gauteng Tactical Response Team (TRT), SAPS Anti-Gang Unit, Tracker Connect, Cap Specialized Operation, GTP Saturation Unit, kanye ne-ICB-Insurance Crime Bureau.

Imizamo yokubambisana iholele iziphathimandla eSky City, eKlipsrivier, eGauteng, lapho kwatholakala khona imoto yakwaChevrolet Spark ipakwe endaweni okuhlala abantu.

Ngesikhathi amaphoyisa esesha imoto athole isibhamu sokuzingela esingekho emthethweni sinezinhlamvu, amaselula amabili nemibese okusolakala ukuthi ibisetshenziswa ukusika izimpondo zobhejane. Abesilisa ababili abatholwe emotweni baboshwe ngokushesha, kwathathwa izimpahla kanye nemoto.

Kumanje uthungatha umsolwa owabalekela ukuboshwa eKranskop Tollgate, kanti iziphathimandla zimatasa zithungatha isidumbu sikabhejane okubikwa ukuthi udutshuliwe.

Abanolwazi ngomsolwa ofunwayo bayanxuswa ukuthi bathinte umphenyi wecala uCaptain Pieter Meyer ku-082 319 9460 noma iCrime Stop ku-08600 10111, noma bavakashele esiteshini samaphoyisa esiseduze noma basebenzise iMySAPS App.

Abasolwa abane, okungakacaci iminyaka yabo, kulindeleke ukuba bavele ngaphambi kweNkantolo yeMantshi yaseModimolle ngoLwesithathu, Januwari 31, 2024, babhekene namacala okubulala obhejane kanye nokutholakala nesibhamu esingekho emthethweni nezinhlamvu. Uphenyo oluqhubekayo luhlose ukuthola ukuxhumana okungenzeka phakathi kwabasolwa namanye amacala okuzingela ngokungemthetho.