‘Bheka igrosa yakho ediliviwe’ kuxhayisa amaphoyisa iJMPD

Sekuphume isixweyiso ngabathenga igilosa behleli emekhaya ngomkhuba owenziwa abasheyeli bezithuthuthu ezibalethelayo uma usuthengile. Loluhlelo oluhambisana nendlela yesimanje yokuthenga ezitolo ezinkulu kodwa ube uzihlalele ekhaya lubukeka lukhula eNingizimu Afrika kepha lemboni inezihibe okuxwayiswa umphakathi ngazo.

UMnyango wamaPhoyisa kaMasipala waseJoburg (JMPD) asanda kubopha insizwa esebeza ngokuhambisa igilosa ngesithuthuthu ohlelweni lokuthenga i Checkers 60 Minutes. Lensizwa ibanjwe ngamaphoyisa iJMPD mayelana ngokuhamba ngesithuthuthu esintshontshiwe. Owesilisa, 27, utholwe egibele isithuthuthu okubikwa ukuthi sebiwe, wabe esevalelwa eSandton SAPS.

Ngokusho kukaSuperintendent Xolani Fihla, okhulumela i-JMPD, ukuboshwa kwenzeke amaphoyisa ophiko lwe-Tactical Response Unit athole ulwazi ngesithuthuthu esimhlophe esintshontshiwe i-Bigboy ebesifunwa amaphoyisa e-OR Tambo International SAPS.

Babe sebeqhubeka nokugada endaweni yaseSunninghill. Ngesikhathi amaphoyisa ehlola, abone isithuthuthu esifana nencazelo yalesi esebiwe kuNanyuki Road eSunninghill.
Bamisa isithuthuthu babuza umgibeli ukuthi usithole kanjani.

Nokho uhlulekile ukunikeza impendulo ezwakalayo, okwaholela ekutheni aboshwe ngecala lokutholakala nempahla eyebiwe. Kamuva kuvele ukuthi umsolwa ubephuma ukuyohambisa impahla ngesikhathi ebanjwa amaphoyisa.

Isithuthuthu esitholiwe besigoqwe ngohlelo lokusebenza lokulethwa kwegrosa i-Checkers Sixty60. Ukuboshwa kusebenza njengesikhumbuzo sokubaluleka kokubika impahla entshontshiwe kanye nokuhlinzeka ngezincazelo ezinembile kuzinhlaka zomthetho.

USuperintendent Fihla ugcizelele iqhaza lamalungu omphakathi ekusizeni amaphoyisa emizamweni yawo yokulwa nobugebengu. Uthe, “Sinxusa umphakathi ukuthi uqaphe futhi ubike izinto ezisolisayo noma izinto onazo. Ngokusebenzisana, singasiza ekuqinisekiseni ukuphepha nokuvikeleka kwemiphakathi yethu.” I-JMPD iyaqhubeka nokusebenza ngokungakhathali ukuze ibambe abantu ababandakanyeka ezenzweni zobugebengu futhi ithole impahla eyebiwe.