INhloli yebhola esizakhele igama ngokuvundulula ithalente labadlali ezigabeni zama-amesha KwaZulu-Natal, ifunga iyagomela ukuthi umdlali wasesiswini embone kumaSalga Games muva nje, uzolandela ezinyathelweni zenkakha yeKaizer Chiefs neBafana Bafana, uDoctor Khumalo. Lo mdlali obatshazwayo, uLindokuhle “Sphuzo” Zikhali, ongumdlali wasesiswini obengukaputeni weqembu lebhola laseMkhanyakude ebeliyibambe kumaSalga Games muva nje, eRichards Bay, ekuqaleni kwale nyanga. UZikhali (18) nakuba ezakhe uMkhanyakude zehlulekile ukuvikela isicoco sawo sangonyaka odlule samaSalga, ziguqiswa yiLembe kowandulela owamanqamu, kodwa esikhathini esingengakanani uzozithola esedlala esigabeni esikhokhelayo seMotsepe Foundation Championship (First Division).
Lesi siphekepheke somdlali wasesiswini odabuka eMtubatuba, singabanye babadlali abathathe amehlo kaTebogo Moloi weTM Scouts oyinhloli eyaziwayo eKZN ngokuba neso elibukhali ekuboneni abadlali abanekhono abase emaqenjini ePremier Soccer League (PSL).
UZikhali noNhlanzeko Mhlongo, naye ongumdlali wasesiswini obemele iKing Cetsshwayo kumaSalga Games, bobabili sebesayiniswe yiBlack Leopards neVenda Football Club. UZikhali obeyisethenjwa soMkhambathi FC edlala kwiSafa KZN ABC Motsepe League, usayiniswe yiLeopards, uMhlongo wasayiniswa yiVenda.
“Ikhono likaSphuzo liyamangalisa, angingabazi nakancane ukuthi kumasizini ambalwa ezayo uzobe egijima eqenjini elikhulu kwiPremiership. Lo mfana usazokwenza izimanga ebholeni, uyothi ngasho. Ngibona uDoctor Khumalo kulo mfana. Njengoba ijezi likaDoctor, uNumber 15, lingakagqokwa muntu namanje kwiKaizer Chiefs, ngelinye ilanga uyongibuza ungiphale ulimi mhlazane ethi uDoctor ijezi lakhe ulinika lo mfana,” kusho uMoloi. “Naku-Ox (Sbongiseni Mthethwa) mhlazane ngimbona obhuqwini edlala ezitekini, ngasho kanje ngathi ngibona isihlabani somdlali esizogijima eqenjini elikhulu esikhathini esingengakanani. Ngaphinda ngasho okufanayo nakuMelusi Buthelezi.”
UMoloi usho kanjena nje nguyena owavundulula ikhono likaSbongiseni “Ox” Mthethwa eminyakeni embalwa edlule edlala ezitekini eBergville, njengoba namuhla eseyinjini yasesiswini kwiKaizer Chiefs. Kanjalo noButhelezi waseNquthu, naye wavundululwa yiyo le nhloli ezitekini zebhola eNquthu, wadlala emaqenjini ehlukene okubalwa kuwo iJomo Cosmos neTS Galaxy, njengoba namuhla eseyisethenjwa sikanozinti kwi-Orlando Pirates.
Discover more from IBUNDA NEWS
Subscribe to get the latest posts sent to your email.
