Abesifazane ababili abasolwa ngokudubula ngokungemthetho endaweni yomphakathi kanye nokulimaza umuntu ngesikhathi kungcwatshwa umsolwa obamba izimoto zemali,bavele enkantolo yemantshi yaseTsolo. UBongo Yonela Dipa, 24, noChumisa Phunguzwa, 35, bavele kafushane ngoLwesihlanu ngemuva kokuboshwa kwabophiko oluphenya ngobugebengu obuhleliwe boKlebe e-Eastern Cape kanye nethimba elibhekelele ukuthuthwa kwemali.
Okhulumela oKlebe, u-warrant Officer Ndiphiwe Mhlakuvana, uthe “kusolakala ukuthi uDipa noPhunguzwa bathamela inkonzo yomngcwabo womsolwa osolwa ngokubamba inkunzi eCIT eyenzeke ku-N2 Tsolo. Laba kubikwa ukuthi bebephakathi kwabantu abebehambele inkonzo yomngcwabo ebiseMcetywa kuTsolo.
“Laba bobabili kuthiwa baphinde badubula ngokungemthetho endaweni yomphakathi ngesikhathi kuqhubeka inkonzo yomngcwabo. Ngenxa yesigameko okusolwa kuso ukudubulana kwalimala oyedwa. Kwavulwa idokodo lecala ladluliselwa ethimbeni loKlebe le-CIT ukuze liphenywe.” Kwabe sekwenziwa uphenyo kwagcina sekuhlanganisa laba besifazane nalesi sigameko base beboshwa.
UPhunguzwa noDipa babhekene necala lokukhulula isibhamu esingekho emthethweni, elokutholakala nesibhamu esingekho emthethweni nelokuzama ukubulala. Badedelwe ngebheyili ka-R2 000 umuntu ngamunye. “Icala lihlehliselwe uFebhuwari 5 2024 ukuze kuqhutshekwe nophenyo,” kusho oKlebe.
Discover more from IBUNDA NEWS
Subscribe to get the latest posts sent to your email.
