Kuvela izinsolo ezinqala ngeKhansela leActionSA eNewcastle

I-DA eKZN isibhalele uSomlomo kamasipala waseNewcastle, uMnuz Thengi Zulu, imcela ukuthi amise ikhansela le-ActionSA elibhekene necala lokuhlukunyezwa ngokobulili. Ikhansela uMzwakhe Mbatha kuthiwa lenze leli cala ngo-Agasti emuva kokuphuza. I-DA Women’s Network (DAWN) e-KZN ithe icela ukuthi kuphenywe ngokushesha futhi ngobubulungiswa obuqinile mayelana nezinsolo ezibucayi zodlame ezibhekiswe kuMbatha oyiKhansela le-Action SA.

Ngokubiuka kweNewcastillian News , kuqalwe uphenyo mayelana nokuziphatha kwekhansela likamasipala waseNewcastle, kulandela ukusolwa ngokuphoqa owesifazane osemncane ukuthi abaleke ekhaya engagqokile. Lesi sigameko sisanda kudonsa amehlo emphakathini ngemuva kwencwadi yalo wesifazane enemininingwane ngesigameko esisabalele ezinkundleni zokuxhumana, ekhomba uKhansela Mzwakhe Mbatha we-ActionSA njengesikhulu esithintekayo. Incwadi ibibhekiswe kumholi wekhokhasi ye-ActionSA, uFaizel Cassim, eveza ngokucacile izenzo zekhansela. Lona wesifazane uchaza kanje, “Njengabaningi baseNingizimu Afrika, ngangiqhutshwa isidingo sokubona izwe lami lilungiswa. Ngakho-ke ngithathe isinqumo sokuthi ngibe yilungu ngokusemthethweni mhla ziyisi-6 kuNcwaba wezi-2023 okuwusuku engahlangana ngalo no-Cllr Mbatha,” engeza ngokuthi ikhansela libe nomusa kuye nakudadewabo, kwaholela ekutheni bamhloniphe.

Nokho ugcizelele ukuthi konke lokhu kwashintsha mhla zingama-26 kuNcwaba wezi-2023, ngemuva kokuba uKhansela Mbatha ememe lo wesifazane kanye nodadewabo emcimbini we-ActionSA obubanjelwe kuWadi 7 no-8. Ngokuchaza kwalo wesifazane, ikhansela namanye amalungu eqembu lezepolitiki baqoqe abesifazane ababili ngosuku lomcimbi. Izinto zishintshe ngenkathi kuphela umsebenzi wosuku, futhi izikhulu ezengamele i-ActionSA sezigodukiswa, izinto zashintsha.

Ngokusho kwalo wesifazane, uCllr Mbatha kusolakala ukuthi wamthatha kanye nodadewabo baya ethaveni ukuze bayophuza iziphuzo, bajoyinwa esinye isikhulu se-ActionSA. Ethaveni laba besifazane ababili baphuziswe utshwala, ngaphambi kokuthi bayiswe kwenye indawo ukuze bathole ukudla notshwala obengeziwe.
“Ngezithuba zabo-09:00, bengifuna ukuya ekhaya, kodwa uCllr Mbatha ubebukeka enganeme ngalokhu,” esho eqhubeka echaza nokuthi ucingo lwakhe beselufihlwe emotweni ukuze angabuyi ekhaya.

Nokho, lona wesifazane wathi encwadini yakhe, “Ngaqala ukulwa nokubanga umsindo njengoba ngangibona lokhu njengendlela yokungivimbela ukuba ngigoduke, ngenjongo ecacile yokuthi ngangizohamba nabo. Kube nokuhilizisana okwahlakazwa amaphoyisa akwa-SAPS, abanye abe-ActionSA behla emotweni beyokhuluma nabezomthetho njengoba uCllr Mbatha esolwa ngokujikijela lo wesifazane ngenhlamba. Wabe esegibela emotweni ecabanga ukuthi uzoyiswa ekhaya.

Emuva kokusuka endaweni kuthiwa uCllr Mbatha ube nolaka yize esinye isikhulu besizama ukumehlisa umoya. “Wabe (uCllr Mbatha) wangibamba ihembe lami le-ActionSA, ethi angilikhumule noma ngishiye imoto. Ngangesaba kakhulu futhi ngisengozini ngalo mzuzu, futhi wayebonakala efuna ukungiklebhula isikibha. Bengikhala kakhulu,” kubhala lo wesifazane.
Uqhube wathi wazibophezela ngezidingo zekhansela, wakhumula ihembe wagibela emotweni, ngaphambi kokuba abaleke esengagqokile izingubo, udadewabo elandela. “Angikaze ngizizwe ngingaphephile futhi ngidalulwe ngale ndlela ekuphileni kwami,” kusho lona wesifazane.

Ngenxa yokwanda kwesibalo sokudlwengulwa kanye nokuhlukunyezwa ngokobulili eNingizimu Afrika, lo wesifazane ugcizelele ukuthi ukholelwa ukuthi uCllr Mbatha ubeka engcupheni ukuphepha nenhlalakahle yakhe engozini. Emuva kwalesi sigameko, manje usefuna ukuthi i-ActionSA ithathele uKhansela Mbatha izinyathelo ezizoqinisekisa ukuthi amacala afana nalawa angenzeki kwabanye besifazane.

INewcastillian News ixhumane nomholi wekhokhasi yeqembu lezepolitiki, uCllr Faizel Cassim, othe, “Ngiyazazi lezi zinsolo futhi sezidluliselwe kusihlalo wesiFundazwe nokazwelonke. Ngeke ngikwazi ukuphawula kakhulu ngalokhu njengoba kusaphenywa.” Nokho, okhulumela i-ActionSA eKZN, uSanelisiwe Zuma, uchaze ukuthi akukhona nje ukuthi i-ActionSA iyazi ngalezi zinsolo futhi okwamanje iyaphenya ngalolu daba, kodwa icabanga nokumisa okwesikhashana uKhansela uMbatha ngesikhathi kuqhubeka uphenyo.

Ngesikhathi iqembu lisaphenya ngalolu daba, liqinisekisa imininingwane eyethulwe, uZuma uthe, “I-ActionSA njengeqembu sizithathela phezulu izinsolo ze-GBV futhi sinxusa futhi sikhuthaze amalungu ethu ukuthi abike noma yiziphi izigameko ze-GBV ukuze zisingathwe ngokushesha. I-ActionSA ihlezi ibeka phambili izithakazelo zamalungu ayo kanye nomphakathi wonkana.”

Njengoba lolu daba seluphenywa, umthombo osemthethweni ukuvezile ukuthi lolu daba selubikiwe nakwaSAPS, njengoba namaphoyisa esethinteka kulolu daba.