Kuhlukene imibono ngomfuziselo kaMandela noTambo odle R22m

Ngu: Nonkululeko Mazibuko

Umengameli uCyril Ramaphosa uvule ngokusemthethweni imifuziselo emikhulu kaNelson Mandela no-Oliver Tambo eThekwini ngoLwesibili.

Lomcimbi wenziwe ngaphansi kwamasipala weTheku ngenhloso yokuhlonipha amaqhawe omzabalazo alwela inkululeko yaseNingizimu Afrika. Le mfuziselo ukwenziwa kwayo osekususe umsindo kudle uR22 million.

IBunda News likhulume nabantu lathola lemibono ehlukene.

UThubalethu Mzimela oziphilisa ngokudayisa olwandle eThekwini uthe: “Ngicabanga ukuthi lokhu okwenzakele kuhle ngoba kuzoletha abantu abaningi lapha bese kuthuthuka ibhizinisi lami. “

UMzimela uqhube wathi akasakwazi ukulinda ukubona izivakashi sezitheleka.

Ezinye izakhamuzi ziveze ukunganami neze ngemali esetshenzisiwe.

Ilunga lomphakathi elingathandanga ukuveza igama lithe “lemali echithwe lapha ibingasetshenziselwa ukwakhela abantu izindlu noma amathuba omsebenzi”

U-Anele Mkhize yena ukholelwa ukuthi lokhu okwenzakele namuhla ukuveza ukuthi imali ikhona ezweni. “Ngiyathemba kuzolandela nokuthuthukiswa komphakathi emva kwaloku”

Ethula inkulumo yakhe, uRamaphosa uthe ujabule ngalo msebenzi ngoba ugcina umlando wezwe.