Izingxoxo zombimbi ze-DA ne-ANC eGauteng zibhidlikile ngezikhundla zeKhabhinethi

Izingxoxo eziphakathi kweDemocratic Alliance (DA) ne-African National Congress (ANC) zokubumba uhulumeni wobumbano esiShayamthetho saseGauteng zishaye ungqimphothwe. Zombili izinhlangothi zehlulekile ukufinyelela esivumelwaneni mayelana nokwabiwa kwezikhundla zekhabhinethi, nokwenze iDA yahoxa ezingxoxweni.

UHelen Zille, onguSihlalo we-DA, ukhulume nabezindaba eGoli, ehlinzeka ngemininingwane mayelana nokubhidlika kwezingxoxo. Uzwakalise ukuphoxeka kwe-DA ngendlela i-ANC eqhuba ngayo, wathi nakuba i-DA izimisele ukuxoxisana, i-ANC ayibaphathi ngenhlonipho nangendlela efanele.

“Sizamile ukuhlangana ne-ANC, kodwa yangatholakala,” kusho uZille. Umnyombo wokungaboni ngaso linye usesiphakamisweni se-ANC sokunikeza iDA izikhundla ezintathu kweziyishumi kwikhabhinethi, ngaphandle kokucacisa ngokusatshalaliswa kwezikhundla ezisele.

“Bebefuna ukusinika lezi zikhundla ngaphandle kokusitshela ukuthi bangaki izihlalo abahlose ukuzithathela bona, nokuthi bangaki abahlongoza ukuzinikeza amanye amaqembu,” kuchaza uZille. I-ANC iphakamise ukuthi kugcinwe izikhundla eziyisikhombisa, okuhlanganisa nesikaNdunankulu, uZille uthe azihambisani nemigomo ebekwe ku- Clause 16 of the Declaration of Intent.

Lesi sigaba somthetho sigcizelele ukwabiwa ngokulinganayo kwezikhundla zeKhabhinethi, uma kubhekwa ingxenye ye-DA engama-45% kanye nengxenye ye-ANC engu-55% kuHulumeni ohlongozwayo Wobumbano Lwesizwe (GNU). “I-ANC namhlanje ivumile ukuthi ibihlose ukwabela i-DA izihlalo ezintathu, kuKhabhinethi yabayishumi (okuhlanganisa noNdunankulu we-ANC). Lesi sigaba singaphansi kakhulu kwezidingo ezibekwe ku- Clause 16 of the Declaration of Intent,” kusho uZille.

UZille uphinde waveza ukuthi isiphakamiso se-ANC sokunikeza isikhundla sikaNgqongqoshe oyedwa kwiNkatha Freedom Party (IFP) akwamukelekile, uma kubhekwa amandla angalingani i-ANC esanawo. Uphinde wagcizelela isimo se-DA sokufuna ukusatshalaliswa ngendlela efanele: izikhala zekhabhinethi ezine ze-DA, esisodwa se-IFP, nezihlanu ze-ANC.

“Asivumi ukuthi sibanjwe yiGNU. Sifuna ukulingana, ukubandakanywa, nokuhlonipha intando yabavoti. Ukulinganisa kubalulekile,” egomela. Njengoba i-ANC ibambe izihlalo ezingu-28 esiShayamthetho saseGauteng (34% wamavoti) kanti i-DA ibambe izihlalo ezingu-22 (27% wamavoti), ukungqubuzana kunomthelela omkhulu ekubuseni kwesifundazwe.

Iziphendulela i-ANC ikubeke kwacaca ukuthi ngeke batshelwe yiDA mayelana nokwabiwa kwezikhundla. Sebesabise ngokuqhubeka nokumemezela ikhabhinethi ngokuhlanganyela noma ngaphandle kweDA. I-DA iveze ukuthi izimisele ngokuthatha amabhentshi aphikisayo kunokuthi ibekezelele lokho ekubona njengokuphatha kabi i-ANC.

Njengoba kuqhubeka ukungqubuzana kwezombusazwe, ukubusa kweGauteng kwakusasa akukaqinisekwa. Izakhamizi zakulesi sifundazwe zibhekisisa ukuthi abaholi bazo bahamba kanjani kulesi simo esibucayi.