Ubanjiwe ummeli waseZimbabwe osolwa ngokweba u-R5 million wemali yeRAF

Ummeli wokudabuka eZimbabwe nosezinze kuleli e-East London, ubhekene necala lokweba imali ye-Road Accident Fund (RAF) kumakhasimende akhe ususe umsindo enkantolo kamantshi ngesikhathi eqoka ukuzikhulumela ngemuva kokuxosha ummeli wakhe isikhashana ngaphambi kokuthi kuqale ukuphekwa ngemibuzo kofakazi.

UChinamasa, ofuna ibheyili ngemuva kokuboshwa oKlebe lapho ehlala khona eBeacon Bay, ubhekene namacala amahlanu okweba ahlobene nezicelo zamakhasimende akhe akwaRAF.

Phakathi kwamakhasimende akhe kukhona nowayengumpetha wesibhakela emhlabeni, uSimpiwe Vetyeka, owabandakanyeka engozini enyantisayo eyaholela ekutheni aphumelele isicelo seRAF. Umbuso uthi uChinamasa wasebenzisa isikhundla sakhe ukusiza amakhasimende ukuthi afake izicelo kuRAF, ephethe ama-akhawunti amaningi akwaFNB njengoyedwa owasayina.

Amacala athi uhlulekile ukudlulisa izimali ayezikweleta amakhasimende akhe ngemuva kokuthi izimangalo zawo sezikhokhelwe, ephula isibopho sakhe esingokomthetho sokuvikela imali ayeyiphathisiwe kuma-akhawunti e-trust.

Ngesikhathi kuqhubeka icala uSergeant Chumani Mntumni uveze elinye icala elivulelwe uChinamasa ngoFebhuwari 15, nokwaholela ekutheni ummangalelwa nomshushisi abhekane ngeziqu zamehlo mayelana nentuthuko entsha. Yize uChinamasa ephikisa ukuvela kwaleli cala elisha, uMntumni wema wagcizelela ukuthi leli cala lisemthethweni futhi lidale ukuthi ummangalelwa abekwe amacala.

“Uma sibheka udaba lwekheli, siyaqonda sonke ukuthi akayena umnikazi wendawo ekuBonza Bay Road nalapho ebesebenza khona, isikhathi eside singamtholi. Phezu kwalokho umfakisicelo uveze ukuthi ujwayele ukuya eZimbabwe abuye. Akukho okungamvimba ukuthi abuyele eZimbabwe noma kwelinye izwe.”

Uveze ukuthi zingu-186 ama-akhawunti ebhange likaChinamasa, imali elinganiselwa ku-R2.9m yadluliselwa kuma-akhawunti angaphandle kwaseNingizimu Afrika. Lokhu kwenzeke ngemuva kokuthola imali kwaRAF bese idluliselwa kuma-akhawunti, kusho uMntumni.