Kuboshwe udokotela mbombayi eHillbrow

Kuboshwe abantu ababili bokufika e-Hillbrow, abesebenza njengodokotela ngokomgunyathi ngomsebenzi wokwelapha nokubeka engcupheni impilo emphakathini. Laba basolwa baboshwe uphiko lwe-Tactical Response Unit of Johannesburg Metropolitan Police Department’s (JMPD) kulandela ukulunywa indlebe ngomkhuba osolisayo kuTwist Street. Esebenza ngokobunhloli, amaphoyisa abheke ibhilidi abona abantu abangena nabaphumayo, okusolakala ukuthi bayiziguli.

Bathe bengena kule ndawo babuza lo mlisa okuthiwa “ngudokotela” oqale waphika wathi ungumphathi. Nokho, eminye imibuzo iphinde yaveza ukuthi omunye wesilisa waqinisekisa ukuthi baqhuba lo mkhuba ngokungemthetho. Okwengeza lokhu kukhathazeka, amaphoyisa athole imishini yezokwelapha eyahlukene kanye nemithi efana nezinsiza zokuhlola, ama-ARV, imijovo, namabhakede anegazi, okuvusa ukwesaba mayelana nokuba semthethweni nokuphepha kwezinqubo ezenziwayo.

Bobabili abasolwa, abaneminyaka engu-47 no-54 ubudala, baboshwe bagqunywa e-Hillbrow SAPS. Ukwengeza, kuzothintwa i-Health Professions Council of South Africa (HPCSA) ukuze kuqinisekiswe izimfanelo “zikadokotela” osolwayo kanye nokuba semthethweni kwalo mkhuba.

USuperintendent Xolani Fihla, okhulumela i-JMPD, ugcizelele izinyathelo ezisheshayo ezithathwayo waphinde waxwayisa ngalezi zenzo ezingekho emthethweni. “Lesi senzo esisheshayo sezikhulu zethu sikhombisa ukuzibophezela kwethu ekuvikeleni impilo nokuphepha kwezakhamizi zethu,” esho. “Sinxusa umphakathi ukuthi uqaphele futhi ubikele iziphathimandla nganoma yimiphi imikhuba yokwelapha esolisayo.”

Lesi sigameko sigqamisa izingozi ezingaba khona kwelapha mbumbulu kanye nokubaluleka kokufuna usizo lwezokwelapha kodokotela abaqeqeshiwe nababhalisiwe. Ukuqapha kwe-JMPD kanye nesinyathelo esisheshayo sisebenza njengesikhumbuzo semizamo eqhubekayo yokulwa nemisebenzi engekho emthethweni kanye nokuvikela impilo yomphakathi.