Iphoyisa libulale ilungu le-SANDF kubangwa intombi

Amaphoyisa abheka isigameko esibuhlungu lapho omunye wawo edubule wabulala isosha emnyango wesiteshi samaphoyisa eHoedspruit eLimpopo. Uphiko oluphenya amacala athinta amaphoyisa i-Independent Police Investigative Directorate (IPID) lubophe iphoyisa, 37, kulandela ukuhilizisana kwaze kwadutshulwa kaningi kuleli sosha.

Ngokusho kohlaka lwamaphoyisa, usayitsheni ube nengxabano nelungu leSA National Defence Force (SANDF) elineminyaka engu-33 ubudala endaweni yokucima ukoma iKinimambo. Ngokubika kweNews24 ingxabano phakathi kwalaba ababili ibimayelana nentombi ehlala ndawonye nabo. Ilungu le-SANDF liye esiteshini samaphoyisa eHoedspruit liyobika icala kodwa latshelwa ukuthi libuye ngokuhamba kwesikhathi ngoba laliphuzile.
Usayitsheni uye esiteshini samaphoyisa ngezithuba zabo-02:30 wazithela phezu kwelungu le-SANDF ngaphandle kwesiteshi samaphoyisa kanti kuthiwa udubule kaningi kwalimala kabi ilungu le-SANDF. Abezimo eziphuthumayo baveze ukuthi ushonile endaweni yesigameko.

Icala libikwe kwa-IPID, kwaboshwa iphoyisa. Uzovela eNkantolo yeMantshi yaseHoedspruit ngoMsombuluko, ebhekene necala lokubulala. I-SANDF ikuqinisekisile “ukudlula emhlabeni kungazelelwe” komunye wamalungu ayo oMbutho Wasemoyeni obeseHoedspruit. I-SANDF iqinisekisa ukudutshulwa kwelungu e-hoedspruit ngamaphoyisa kanti amaphoyisa namasosha aphenya leli cala.