Owayengumdlali weBafana Bafana, uLerato Chabangu, uthi uyinhlekisa ngemuva kokulahlekelwa yikho konke akuzuza ngokudlala ibhola elikhokhelayo. UChabangu owake wagijima kuMamelodi Sundowns, Moroka Swallows, neSuperSport United ubekhuluma noMahlatse Mphahlele kuleli sonto.
Engxoxweni yakhe neSowetan, lo mdlali owake wagijima kuBafana uChabangu uthi ulahlekelwe yindlu ayithengela unina futhi akanazo ngisho izingubo zokugqoka. UChabangu uqhubekile nokuphumela obala ngokuthi udonsa kanzima ngemuva kokuphanyeka amabhuzu akhe ebhola eveza ukuthi unezindebe kuphela aziwine esengumdlali. “Ngathengela umama umuzi ngalahlekelwa yikho, ngilahlekelwe yikho konke. Anginawo namabhuzu ebhola manje, anginazo izingubo ongathi zizongikhumbuza isikhathi esidlule.
“Nginezindebe kuphela kodwa ngilahlekelwe kakhulu. Abantu bangangehlulela kodwa ngisaqhubeka. Anginayo imali kodwa ngiyaphithizela. Umama akanalo ikhaya, umfowethu akatholakali. “Ngihlala endlini yomndeni futhi angazi ukuthi izingane zami zikuphi. Kuyadabukisa.”
“Kunzima kodwa ngibonga uNkulunkulu ukuthi ngisaphila futhi kuningi engikufundile. Kuningi esibhekene nakho kodwa kumele sikubonge ukuthi impilo iyaqhubeka,” engeza. “Ngesikhathi usujwayele ukuthola imali kungazelele muntu, kuba nzima. “Umndeni ulindele ukuthi uzobuyisela ekhaya kodwa akukho mali engaka. Baphoxekile ngoba igama likaChabangu beliphezulu kodwa manje sengiyinhlekisa.”
Discover more from IBUNDA NEWS
Subscribe to get the latest posts sent to your email.
