Usizi e-UK bevinjelwa ukushada nabangaphandle

Usizi luyakhula ‘ngokuvinjelwa’ kwezakhamizi eziningi zase-UK ezishada nabantu bangaphandle. “Yonke le nto ingithukuthelise ngendlela emangalisayo,” kusho uKatharine Ward. “Lezi yizinto eziyimfihlo kakhulu ezimpilweni zabantu: Ubani omthandayo, lapho uhlala khona… Bese uba nesimemezelo sikahulumeni esiphumayo esisusa zonke lezo zinto ekulawuleni kwakho.”

“Asikho nhlobo isizathu salokho.” Njengamashumi ezinkulungwane zabantu baseBrithani phezulu naphansi kwezwe, uKatherine uthintwe yimithetho emisha yama-visa emenyezelwe uhulumeni ngoMsombuluko odlule.

Kusukela ngo-Ephreli 2024, izakhamizi zaseBrithani noma abantu asebevele bezinze e-UK bazodinga ukukhombisa ukuthi bathola u-£38,700 (R927,909.64) ngaphambi kokuthi ozakwabo baphesheya bahlale nabo. Bangama-27% kuphela abantu abazuza lokhu noma ngaphezulu, ngokwezibalo ze-HM Revenue and Customs.

UKatharine nomlingani wakhe waseJordan bahlala ndawonye eLondon. Beza kulandela ubhubhane lwe-COVID ukuze basondele kubazali asebekhulile bakaKatharine, kodwa manje wesaba ukuthi imali abayitholayo ngokuhlanganyela ngeke ifinyelele umkhawulo. Okwenza izinto zibe zimbi nakakhulu umsebenzi wakhe usengozini futhi lo mbhangqwana ubhekene nethemba elibi lokuhlukana noma bobabili babuyele eJordani.

Uzibonga ngenhlanhla yokuthi abanazo izingane. “Kungumthombo omkhulu wengcindezi,” utshele i-Euronews, echaza ukuthi izindaba zezinguquko zimenze kanjani ehlengezela izinyembezi futhi engakwazi nokugxila, ingqondo yakhe “iphelelwe yithemba” icabanga ukuthi angenza kanjani izinto zisebenze. “Angikwazi ukucabanga ukuthi bekungaba njani uma kuqhubeka izinyanga zokulinda nje ukubona ukuthi lezi zinguquko ezinkulu empilweni yakho zizokwenzeka noma cha.”