Isikhulu sakumasipala i-Matlosana Metropolitan, uNksz Lesego Seametso, nodadewabo, uLebo Seametso, obemele ophikweni lweTraffic kuso lesi sifunda, bathweswe amacala ngokusemthethweni okweba, inkohlakalo, ukukhwabanisa nokushushumbisa imali esiteshini samaphoyisa eKlerksdorp ngoJuni 3. 2024. ULesego ulethwe esiteshini samaphoyisa ngumlingani wakhe, uFikile Mahlophe, osebenza njengebamba leMeya yesiGungu. Ubephelezelwa onogada ababili. ULesego Seametso usolwa ngokudla izimali zikamasipala esebenzisa i-ODP Lawyers, okuyinkampani enenkontileka yisifunda.
Yize inkontileka yabo iphele ekuqaleni konyaka kodwa imali ibingakadluliswa kumasipala. U-Lesego wayebandakanyekile ekuqokweni kwalaba bameli ngesikhathi sakhe sangaphambilini njengenhloko yophiko lwezinkampani. Imali okukhulunywa ngayo yatholwa ngokudayiswa kwendawo kamasipala eHartebeesfontein epulazini lezinkukhu elaziwayo iSupreme Chicken. Inkokhelo yenziwe ku-ODP ngo-2023.
Ngemva kokubhaliswa nokudluliselwa komhlaba, uLesego uyalele abameli ukuthi bangayifaki imali ku-akhawunti kamasipala kodwa bayisebenzisele ukuthenga indawo ahlala kuyo manje, ebiza u-R3 million. Phambilini lo muzi wawungowababili abasebenzisana nabo benkampani yabameli ngaphambi kokuthi udluliselwe kwi-Seametso family trust, ebala uLesego, udadewabo kanye nomunye wabameli abanenkontileka yisifunda njengabaphatheli.
ULesego uvele enkantolo yaseKlerksdorp ngoMsombuluko, ngoJuni 3, 2024, lapho adedelwa khona ngebheyili ka-R20 000, kwathi udadewabo wadedelwa ngebheyili ka-R10 000. Ibheyili ikhishwe ngunkosikazi wakhe, uFikile Mahlophe, obengekho enkantolo. Njengengxenye yemibandela yebheyili, uLesego kumele asayine esiteshini samaphoyisa eKlerksdorp njalo ngoMsombuluko. Amacala athweswe wona ahlukaniswe njengamacala oHlelo 6, kanti kulindeleke ukuthi kuboshwe abanye abantu.
