Amaphoyisa aseDennilton, esifundeni saseSekhukhune, abophe owesifazane, 33, ngezinsolo zokudubula abulale umyeni wakhe. Isigameko esibuhlungu senzeke esigodini sase-Elansdoom ngoMsombuluko, zingama-27 kuNhlaba wezi-2024, ngezithuba zabo-06:00, kulandela ingxabano eshubile eyashuba ngodlame.
Imininingwane yokuqala iveza ukuthi ingxabano iqale ngemuva kokuthi umsolwa ethole ukujola komyeni wakhe, obekwenzeka kuyona le ndawo. Ethukuthele egane unwabu, wathatha isibhamu somyeni wakhe esinelayisensi futhi wamdubula kaningana njengoba ezama ukubaleka. Umufi, 32, udutshulwe wawela emgwaqeni.
Ngesikhathi befika amaphoyisa nabezimo eziphuthumayo bathole isisulu sidindilize edamini legazi base besho ukuthi sesishonile endaweni yesigameko. Isibhamu esisetshenziswe kulesi sigameko sitholakele sathathwa ukuze kuqhutshekwe nophenyo. Uphenyo lokuqala luveze ukuthi lezi zithandani, ezidabuka KwaZulu-Natal, zombili bezifundisa ezikoleni ezahlukene endaweni yaseDennilton.
UKhomishana wamaPhoyisa esifundazweni uLieutenant General Thembi Hadebe ugcizelele umshikashika oqhubekayo wokulwa nokuhlukunyezwa ngokobulili esifundazweni, wanxusa imiphakathi ukuthi ifune usizo lochwepheshe ukuze kuxazululwe izinkinga zobudlelwano kunokuthi iphenduke udlame. Umsolwa uzovela eNkantolo yeMantshi yaseMoutse ngecala lokubulala. Uphenyo lwamaphoyisa lusaqhubeka.
Discover more from IBUNDA NEWS
Subscribe to get the latest posts sent to your email.
