USeema utakule iBucs isicwila nomkhumbi eMhlathuze

ULebone Seema ongumdlali wasemuva we-Orlando Pirates usindise iqembu lakhe sekuvalwe amehlo ngesikhathi eshaya igoli lokulinganisa emdlalweni wabo neRichard Bay eMhlathuze Sports Complex stadium ngoLwesihlanu. Umdlalo uphele ngo 2-2.

I-The Rich boys ibihamba phambili ngamagoli amabili kwelilodwa kodwa EZimnyama zakwazi ukulinganisa sekuvalwe amehlo ngegoli likaSeema.USeema udedele imbumbulu yeshodi labhajwa enethini walizwa ngendaba unozinti we-Richard Bay u-Ian Otieno.

I-Orlando Pirates isidlale imidlalo ye-Betway Premiership League engu-24 kusele imidlalo eyisithupha kuphela, inamaphuzu angu-55. Umqeqeshi we-Orlando Pirates u-Abdeslami Ouaddou usabambelele ngezidindi ukuthi bangayinqoba i-League.

Ngakolunye uhlangothi, iMamelodi Sundowns isele ngomdlalo owodwa ngemuva kwePirates. Iphinde ihambe phambili ngamaphuzu amabili ngaphezulu kwePirates nokwenza umehluko omkhulu phakathi kwalamaqembu amabili asembangweni we-Betway Premiership League.