Ukunqamuka kukagesi okuhlasele eRichards Bay ngoMgqibelo ebusuku kuze kube yiSonto ekuseni kubukeka kuyimbangela yengozi yesitimela. Lokhu kushiwo abeTransnet Freight Rail (TFR) OCC Tactical Volume Planning, abakhiphe isitatimende ngalolu daba.
“Inhloso yalesi saziso wukweluleka imboni ngengozi eyenzeke e-Elubana cishe ngo-06h06 namhlanje ekuseni [ngeSonto]. “Isitimela esingu-4831 sishayisane nesitimela u-4623 ebesimi e-Elubana ngenxa yokunqamuka kukagesi e-Richards Bay, okuholele ekutheni zombili izitimela ziphume emzileni. “Amaqembu asendaweni enza izivivinyo futhi isibuyekezo sizokwabiwa ngokushesha uma imininingwane isitholakala.
“Ezinye izibuyekezo zizokwabiwa abaphathi be-akhawunti ababalulekile.” ITransnet Freight Rail isiqinisekisile isigameko ngoMsombuluko ebusuku yathi iyaqhubeka imizamo yokulungisa isimo kulandela ukuguguleka komzila. “Amaqembu e-TFR athunyelwe endaweni yesigameko ngokushesha futhi imizamo yokubuyisela iqale ngobuqotho. Abekho abantu abalimele kabi ababikiwe, kanti abasebenzi abathintekayo kule ngozi bathunyelwe ukuyobhekwa ngodokotela.
“Amathimba ezemvelo nawo abekhona endaweni yesigameko ukuze aqinisekise ukuthi kuyalandelwa imigomo yokubuyisela nokukhuculula. “Kuyaphenywa ukuze kutholakale imbangela yengozi,” kusho isitatimende se-TFR. Ngokusho kwabezimo eziphuthumayo bakwa-Ambulance KwaZulu Private abebehambele umzila wesitimela izolo (ngeSonto) bekukhona abantu ababili abebesesitimeleni kanti oyedwa wabo wesifazane uthole imihuzukwana wabe esephuthunyiswa esibhedlela ukuze aqhubeke nokwelashwa. Omunye umgibeli uphunyuke engenamyocu.
Discover more from IBUNDA NEWS
Subscribe to get the latest posts sent to your email.
